Dises Jahr hei mier mit emne coolä Lager ds Einsiedle gstartet. I däm Lager hei mier ä cooli Ziit zäme gha u unvergässlechi Täg chönne erläbe. Ir Schuel hei mir üs mit Napoleon beschäftiget, ds Härz gneuer ahgluegt u flissig Franzwörtli glehrt. Ir Chochschuel hei mir nöii Gricht lehrä kenne u o im Englisch heimer tifig gwärchet. Zwüschädri simer ga Bötlifahre u iim dunklä ga ässe – ja o das wärdemer nid vergässe. Gli druf achä hei mir afa bache für nes feins Zmörgeli, leider aber ohni Örgeli. Vo China zum Algebra, vom Algebra zur Rächtschribig, vor Rächtschribig zur Ufklärig u vor Ufklärig zu viunä viunä Wörtli. O d Ischbahn hei mir dörfä erläbe - die blibt üs geng im Hirni chläbe. Richtig Osterä geits iz zue, darum bastlä mir im BG ohni Rueh. Fliessig Smileys gsammlet, hei mir üs gleitig versammlet. Zurä Übernachtig ir Schuel bis zum Pedalofahre ds Unterseeä.

Das ischs iz gsi vo üserä Klass u iz chunnt no das vor ganzä Schuel: Oh sportlech simer i disem Jahr gsi, das het haut eifach müesse si. Vom Sporttag zum OL, vom OL zum Gigathlon, vom Gigathlon zum GP-Bärn u o dr Schneesporttag nid vergässe. Ä Vitrinewettbewärb u ä Tag ar BAM, derzue chunt no ds Schattäspiu vo dä tschechischä Künstler u gmeinsami Wiehnachtslieder singä isch fasch so cool wie Schwingä. Party’s, Fiumä, Gschichtä verzeuä, das vergässe mir nid so baud. Lachä, gränne, stürmä, schleglä, Fridä schliesse, änand verheglä. Ou das hei mir mitenand erläbt.

I däm Sinn schöni Ferie allersits!

Mara Saurer, Christa Bühler